Премьер лигийн хүснэгтийн гуравдугаар байрт бичигдэж буй “Манчестер Юнайтед” клуб “Стэмфорд Бридж” цэнгэлдэхэд зочлон “Челси”-г 1:0 гэсэн гоолын харьцаатайгаар буулган авлаа. Энэхүү ялалт нь түр орлон гүйцэтгэгч Майкл Каррикийн удирдлага дор багийн амжилттай тоглолт үргэлжилж буйг харуулсан бөгөөд “Улаан чөтгөрүүд” Аваргуудын лигийн эрхийн төлөөх өрсөлдөөнд байр сууриа улам бэхжүүлж чадлаа.
Тоглолтын эхний хагаст “Челси” санаачилгыг гартаа авч, Эстевао болон Энцо Фернандес нар аюултай боломжуудыг үүсгэсэн ч гоол оруулж чадаагүй юм. Мөн талбайн эздийн довтлогч Делапын оруулсан гоолыг оффсайд байрлалд байсан хэмээн шүүгч хүчингүй болгожээ. Гэвч тоглолтын явцын эсрэг Бруно Фернандес баруун жигүүрээр нэвтэрч дамжуулалт өгснийг Матеус Куня гоол болгосноор “Юнайтед” завсарлагааны өмнө тэргүүллээ тогтоосон байна.
Хоёрдугаар үед “Челси” тэнцэх гоолыг оруулахын тулд хүчтэй довтолж, Делап болон Мойзес Кайседо нар гоол хийх дөхсөн ч бөмбөг хоёр ч удаа хаалганы хөндлөн шонг оножээ. “Манчестер Юнайтед”-ын хаалгач Сенне Ламменс болон хамгаалагчид нягт тоглолт үзүүлснээр тооны харьцааг хадгалж, нийслэл хотоос чухал гурван оноог авч буцлаа. “Челси” багийн хувьд сүүлийн дөрвөн тоглолтдоо дараалан гоол оруулж чадалгүй хожигдол хүлээж, хүснэгтийн зургаадугаар байрт хэвээр үлдлээ.
