Наполи: Тогтвортой менежмент, шинэ улирлын шинэ сорилт
2025 оны зун Наполигийн хувьд томоохон өөрчлөлтүүдтэй угтсан ч, Италийн өнгөрсөн улирлын шилдэг найман клуб дундаас цорын ганц менежерээ солимоогүй баг бол Наполи юм. Антонио Конте багийг шинэ түвшинд хүргэхээр ажиллаж байгаа ч, менежментийн тогтвортой байдал нь түүнд Ювентустай 2012-2014 онд гурван удаа дараалан аварга болж байсан амжилтаа давтах боломжийг олгож магадгүй байна.
Нөгөө талд, Интер клуб Симоне Инзагигийн удирдлага дор Скудеттогийн төлөө сүүлчийн өдрийг хүртэл өрсөлдсөн ч, Аваргуудын лигийн финалд Парис Сен-Жерменд хожигдсоноор Инзаги клубээ орхисон.
Сери А 2025/26: Шилжилт хөдөлгөөн, шинэ дүр төрх
Виктор Осимхен 2023 онд Наполиг аварга болгосны дараа энэ зун 65 сая фунт стерлингийн үнээр Галатасарайд нэгдэв. Өнгөрсөн улиралд Сери А-гийн мэргэн буучаар тодорсон Матео Ретеги Аталантагаас Саудын Арабын Аль-Кадсияд 56 сая фунт стерлингээр очсон бол шилдэг хагас хамгаалагчаар нэрлэгдсэн Тижжани Рейжндерс Миланаас Манчестер Ситид 46.5 сая фунтаар шилжиж, шинэ багтаа гайхалтай тоглолт үзүүлж байна.
Наполигийн зүгээс хамгаалагч Сам Беукема, Мигель Гутиеррес, довтлогч Ноа Ланг нарыг элсүүлсэн. Гэхдээ хамгийн их анхаарал татсан наймаа бол зургаан удаагийн Премьер лигийн аварга Кевин Де Брюйне Манчестер Ситиг орхин, Наполи клубт нэгдсэн явдал байлаа.
Удирдлагын шинэчлэл ба эргэн ирэлт
Кристиан Чиву энэ улиралд Интерийн менежерээр анхны бүтэн улирлаа эхлүүлж байна. Өмнө нь Нераззуррид хамгаалагчаар тоглохдоо бүх дотоодын цом болон Аваргуудын лигийн түрүүг хүртэж байсан тэрээр, одоо дасгалжуулагчаар амжилтаа давтахыг зорьж байна.
Иван Юрич Рома болон Саутхэмптоныг орхин Аталантатай нэгдсэн бол, тус багийг есөн жил удирдсан Жан Пьеро Гасперини одоо Ромагийн шинэ дасгалжуулагчаар томилогджээ.
Мөн Игор Тудор Ювентусыг өнгөрсөн улирлын төгсгөлд амжилттай удирдсан бол, Миланыг 2021/22 онд аварга болгосон Стефано Пиоли Аль-Насрт богино хугацаанд ажиллаад Фиорентинад эргэн ирсэн байна.
Маврицио Сарри 15 сарын өмнө орхисон Лациод эргэн ирж, Сассуоло нэг улирлын дараа Сери А-д эргэн ирсэн. Плей-оффын ялагч Кремонезе болон 1990/91 улирлаас хойш анх удаа дээд лигт дэвшсэн Пиза клубууд ч мөн энэ улирлын нэг хэсэг болж байна.
Түүхэн хөөцөлдөөн: Чиро Иммобилегийн шинэ зогсоол
35 настай Италийн довтлогч Чиро Иммобиле Бешикташийн төлөө нэг улиралд 19 гоол оруулаад Бологна клубт нэгдсэн. Тэрбээр одоо тав дахь Сери А клубийнхээ төлөө тоглох гэж байна. 353 дээд лигийн тоглолтод 201 гоол оруулаад буй Иммобиле Роберто Бажжогийн нийт гоолтой тэнцэхийн тулд ердөө дөрвөн гоол, харин бүх цаг үеийн гурав дахь мэргэн бууч болохын тулд 16 гоол оруулах шаардлагатай байгаа.
2025/26 оны таамаг: Наполи Скудеттог эргэн хамгаалж чадах уу?
Сүүлийн удаа Скудеттог амжилттай хамгаалсан баг бол Ювентус бөгөөд энэ амжилтыг 2019/20 оны улиралд үзүүлсэн. Наполи болон Интер клубууд сүүлийн таван улирлын дөрөвт нь аваргын төлөө өрсөлдсөн бөгөөд энэ улиралд ч тэр хоёр багийг гол өрсөлдөгчөөр нэрлэж байна.
Антонио Конте туршлагатай, амжилт арвин менежер. Түүний хариуцлагын дор Наполи клуб дахин аваргын төлөө өрсөлдөх чадвартай. Харин шинэ менежер Кристиан Чиву удирдлагын туршлага дутмаг учраас Интерийн хувьд сорилт ихтэй улирал эхлэх гэж байна.
Гэхдээ Наполигийн хувьд гоолын асуудал хүндээр тусаж магадгүй. Өнгөрсөн улиралд Интер тэднээс 20 гоолоор илүү оруулсан. Бельгийн довтлогч Ромелу Лукаку гурван сар тоглох боломжгүй бөгөөд энэ нь багийн хувьд томоохон сорилт болох нь гарцаагүй.
Өнгөрсөн улиралд Лукаку 14 гоол, 10 дамжуулалттай байсан бол Наполигийн тоглогчдоос зургаагаас дээш гоол оруулсан цорын ганц хүн нь Скотт МакТоминай байв. Мөн Лукаку багийнхаа бусад тоглогчдоос зургаагаар илүү дамжуулалт өгсөн нь чухал үзүүлэлт болж байна.
Эх сурвалж:
