АНУ-ын Тээврийн яам Нью-Йорк мужид олгогдсон 33,000 орчим арилжааны жолооны үнэмлэхийг (CDL) хүчингүй болгохыг шаардаж, татгалзсан тохиолдолд холбооны 73.5 сая ам.долларын санхүүжилтийг зогсоохоо мэдэгдлээ. Өнгөрсөн онд хийсэн шалгалтаар тус мужид олгогдсон нийт арилжааны үнэмлэхийн тал хувь нь алдаатай, тэр дундаа цагаачлалын зөвшөөрөл нь дууссан иргэдэд олгогдсон болох нь тогтоогджээ. Флорида мужид гурван хүний амь насыг авч одсон ноцтой осол гарсны дараа холбооны байгууллагуудын хяналт ийнхүү чангарч, Калифорни муж хэдийнэ 200 сая ам.долларын санхүүжилтээ алдаад байна.
Тээврийн нарийн бичгийн дарга Шон Даффи “Би үнэмлэхгүй, чадамжгүй гадаадын жолооч нараас Америкийн ард түмний аюулгүй байдлыг хангах амлалтаа биелүүлж байна” хэмээн мэдэгдсэн юм. Түүний мэдээлснээр улсын хэмжээнд ачааны тэрэгний жолооч нарын 20 хувийг цагаачид эзэлдэг ч “олон улсын” ангиллын үнэмлэх эзэмшигчид 5 орчим хувийг бүрдүүлдэг байна. Үүнээс гадна Даффи Нью-Йорк хотын замын түгжрэлийн хураамж болон метроны гэмт хэргийн асуудлыг шийдвэрлэхгүй бол бусад санхүүжилтийг ч зогсооно гэж сүрдүүлжээ.
Нью-Йорк мужийн захирагч Кэти Хочулын төлөөлөгч Шон Батлер энэхүү арга хэмжээг Ардчилсан нам давамгайлсан “хөх” мужуудыг онилсон улс төрийн явуулга хэмээн нэрлэв. Тэрээр мужийн зүгээс дэд бүтцийн хөрөнгө оруулалтаа хамгаалж, энэхүү шийдвэрийг эсэргүүцэн тэмцэхээ илэрхийлсэн байна. Гэсэн хэдий ч ачааны машины салбарын байгууллагууд чадамжгүй жолооч нарыг зам дээрээс зайлуулах, англи хэлний мэдлэггүй болон эрхгүй хүмүүс 80,000 фунт жинтэй ачааны тэрэг жолоодож буйг таслан зогсоох холбооны хүчин чармайлтыг дэмжиж байгаа юм.
Нөгөө талаас, цагаачдын эрхийг хамгаалагчид зарим үндэстэн ястныг онцгойлон ялгаварлан гадуурхах хандлага ажиглагдаж байгааг шүүмжилж байна. Ялангуяа Флорида, Калифорнид гарсан ослуудад сик үндэстэн /Энэтхэгийн хойд хэсэгт орших Пенжаб мужаас гаралтай, сик шашныг шүтдэг хүмүүс/ жолооч нар холбогдсонтой холбоотойгоор тус бүлгийн иргэд хяналт шалгалтын гол бай болж байгаад тэд түгшиж буйгаа илэрхийлжээ. Ийнхүү Нью-Йорк муж замын аюулгүй байдал, санхүүгийн хориг болон хүний эрхийн асуудал огтлолцсон ээдрээтэй нөхцөл байдалтай тулгараад байна.
