Эквадорын шигшээ багийн хагас хамгаалагч Мойзес Кайседо “Челси” клубтэй долоон жилийн шинэ гэрээ байгуулж, 2033 он хүртэл “Стэмфорд Бридж”-д тоглохоор боллоо. 2023 онд “Брайтон”-оос 115 сая фунт стерлингээр ирсэн түүний сүүлийн үеийн гайхалтай тоглолтуудыг клуб ийнхүү өндрөөр үнэлж, гэрээг нь сунгасан байна.
Кайседо клубын албан ёсны цахим хуудсанд өгсөн ярилцлагадаа: “Би ‘Челси’-д гэрээгээ сунгасандаа маш их баяртай байна. Энэ баг, энэ клуб зөв чиглэлд явж байгааг би мэднэ. Бидний зам ердөө л эхэлж байна. Авах ёстой олон цом бий, би өдөр бүр сайжирч, клубынхээ төлөө бүхнээ зориулахыг хүсэж байна” хэмээн ярьжээ.
“Челси”-гийн урт хугацааны гэрээний бодлого шүүмжлэлд өртөж байсан ч Кайседог авч үлдэж чадсан нь клубын хувьд том амжилт юм. Тэрээр өнгөрсөн жил багийнхаа хамтаар Конференц лиг болон Клубүүдийн ДАШТ-д түрүүлэхэд чухал үүрэг гүйцэтгэсэн билээ.
Клубын хамтран эзэмшигч Бехдад Эгхбали багийн бүрэлдэхүүний тэнцвэрт байдлыг хангах шаардлагатайг хүлээн зөвшөөрч: “Манай багт дэлхийн аварга, Аваргуудын лигийн эзэд, шилдэг залуу тоглогчид бий. Одоо туршлагатай тоглогчид ч нэмэгдэж байна. Бид шилдэг тоглогчдоо авч үлдэх зорилгодоо хүрч чадлаа. Коул Палмер, Мойзес Кайседо, Энцо Фернандес, Леви Колуилл, Реес Жеймс зэрэг дэлхийн хэмжээний тоглогчид ирэх 10-15 жилд клубын домог болно гэдэгт итгэлтэй байна” хэмээн онцолжээ.
Дашрамд дурдахад, багийн ахлагч Реес Жеймс мөн өнгөрсөн сард клубтэйгээ зургаан жилийн шинэ гэрээ байгуулаад байгаа юм.
Өө гоё гоё