Холливудын 80, 90-ээд оны домогт жүжигчид болох Хизер Локлир, Лоренцо Ламас нар хэдэн сарын турш нууцаар болзож, харилцаагаа албан ёсны болгож байгаа тухай мэдээлэл шүтэн бишрэгчдийг нь гайхшрууллаа. “Dynasty”, “Melrose Place”, “TJ Hooker” зэрэг цувралуудаараа үзэгчдийн танил болсон Хизер болон “Falcon Crest”-ийн од Лоренцо нар хэдийнэ ойр дотныхоо хүмүүст харилцаагаа баталсан байна.
“TMZ” сайт тэдний Лас Вегас хотноо хамтдаа явж буй зургуудыг анхлан нийтэлж, энэхүү шуугианыг эхлүүлсэн юм. Тэд шинэ жилийн баярын үдэш буюу 2025 оны 12 дугаар сарын 31-нд Лас Вегасын алдарт “Barry’s Steakhouse” зоогийн газарт хамтдаа баяраа тэмдэглэж байгаад папарацциудын дуранд өртжээ.
Эх сурвалжуудын мэдээлж буйгаар хосуудын харилцаа маш хурдацтай бэхжиж байгаа бөгөөд тэдний насанд хүрсэн хүүхдүүд ч удахгүй уулзаж, танилцахаар төлөвлөж байгаа гэнэ. Сонирхолтой нь, хоёр жүжигчин хоёулаа 2025 онд хувийн амьдралдаа томоохон өөрчлөлт хийсэн юм. Лоренцо Ламас өнгөрсөн оны долдугаар сард зургаа дахь эхнэрээсээ салах өргөдлөө гаргасан бол, Хизер Локлир тавдугаар сард удаан хугацаанд үерхсэн найз залуутайгаа гэрлэхээр төлөвлөж байсан ч цуцалсан билээ. Ийнхүү ганц бие байсан 80-аад оны телевизийн “хатагтай”, “ноёнтон” хоёр 2026 оны хамгийн гэнэтийн хосоор нэрлэгдэж байна.
